ಸಿದ್ಧಾಪುರ: ಕಳೆದ ಆಗಸ್ಟ್ ತಿಂಗಳಿನಲ್ಲಿ ಕೊಡಗು ಜಿಲ್ಲೆಯ ವಿವಿಧ ಪ್ರದೇಶಗಳಲ್ಲಿ ಮಹಾ ಮಳೆಯಿಂದ ಪ್ರವಾಹಕ್ಕೆ ತುತ್ತಾಗಿ ಸುಮಾರು ಇನ್ನೂರರಷ್ಟು ಮನೆಗಳು ಕೊಚ್ಚಿ ಹೋಗಿ, ನೂರಾರು ಮನೆಗಳು ಹಾನಿಗೀಡಾಗಿದ್ದವು. ಸಾವಿರಾರು ಮಂದಿ ಸಂಕಷ್ಟಕ್ಕೀಡಾಗಿ ಅಪಾರ ನಾಶ-ನಷ್ಟಗಳು ಸಂಭವಿಸಿದ್ದವು. ಪ್ರಸ್ತುತ ಸಂದರ್ಭದಲ್ಲಿ ಸ್ಥಳೀಯ ಜಮಾಅತೆ ಇಸ್ಲಾಮೀ ಹಿಂದ್ ಹ್ಯೂಮೇನಿಟೇರಿಯನ್ ರಿಲೀಫ್ ಸೊಸೈಟಿಯ ಕಾರ್ಯಕರ್ತರು ಧಾವಿಸಿ ಸಂತ್ರಸ್ತರಿಗೆ ಹಲವು ರೀತಿಯ ಸಹಾಯ-ಸಹಕಾರಗಳನ್ನು ಮಾಡಿದ್ದರು. ಸಿದ್ಧಾಪುರ ಎಂ.ಜಿ. ರಸ್ತೆಯಲ್ಲಿ ಕೊಡಗು ರಿಲೀಫ್ ಸೆಲ್ನ್ನು ತೆರೆದು ಹಲವು ತಿಂಗಳುಗಳಿಂದ ನೆರೆಪೀಡಿತರಿಗೆ ನೆರವು ನೀಡುತ್ತಿದೆ. ಕಳೆದ ನವೆಂಬರ್ 5 ರಂದು ಸಂತ್ರಸ್ತರಿಗೆ ಸುಮಾರು 40 ಲಕ್ಷ ರೂಪಾಯಿ ವೆಚ್ಚದಲ್ಲಿ ನಿರ್ಮಿಸಲಾದ ಹದಿಮೂರು ಮನೆಗಳ ಪೈಕಿ ಮಡಿಕೇರಿಯ ಎಂಟು ಹಾಗೂ ಸಿದ್ಧಾಪುರದಲ್ಲಿ 5 ಮನೆಗಳನ್ನು ಜಾತಿ ಮತ್ತು ಭೇದವಿಲ್ಲದೇ ವಿತರಿಸಲಾಯಿತು.
ಇದೀಗ ಸಿದ್ಧಾಪುರದ ನೆಲ್ಯ ಹುದಿಕೇರಿ ನಲ್ವತ್ತೆಕ್ರೆ ಎಂಬಲ್ಲಿ ದಾನಿಯೋರ್ವರು ನೀಡಿದ 2 ಎಕರೆ ಸ್ಥಳದಲ್ಲಿ ಸರಕಾರದಿಂದ ಈ ತನಕ ವಿವಿಧ ಕಾರಣಗಳಿಂದ ಯಾವುದೇ ಸೌಲಭ್ಯ ಲಭಿಸಿಲ್ಲದ ಸಂತ್ರಸ್ತರನ್ನು ಗುರುತಿಸಿಕೊಂಡು ಸುಮಾರು 50 ಮನೆಗಳನ್ನು ಪೀಪಲ್ಸ್ ಫೌಂಡೇಶನ್ ಚಾರಿಟೇಬಲ್ ಟ್ರಸ್ಟ್, ಎಚ್.ಡಬ್ಲ್ಯೂ.ಎ. ಚಾರಿಟೇಬಲ್ ಫೌಂಡೇಶನ್ ಹಾಗೂ ಹ್ಯೂಮೇನಿಟೇರಿಯನ್ ರಿಲೀಫ್ ಸೊಸೈಟಿ ಇದರ ಸಹಯೋಗದೊಂದಿಗೆ ನಿರ್ಮಿಸಿಕೊಡಲು ಯೋಜನೆಯನ್ನು ಹಾಕಿಕೊಂಡಿದ್ದು, 2020 ಮಾರ್ಚ್ 4 ರಂದು ಸಂಜೆ 4.30ಕ್ಕೆ ಸಿದ್ಧಾಪುರ ಹಿರಾ ಸೆಂಟರ್ ನ ಪ್ರಾಂಗಣದಲ್ಲಿ ಶುಂಕು ಸ್ಥಾಪನಾ ಸಮಾರಂಭವನ್ನು ಹಮ್ಮಿಕೊಳ್ಳಲಾಗಿದೆ.
ಕಾರ್ಯಕ್ರಮದಲ್ಲಿ ಜ.ಇ. ಹಿಂದ್ ಕರ್ನಾಟಕ ರಾಜ್ಯಾಧ್ಯಕ್ಷರಾದ ಡಾ| ಬೆಳಗಾಮಿ ಮುಹಮ್ಮದ್ ಸಾದ್ ಬೆಂಗಳೂರು, ಕೇರಳ ರಾಜ್ಯ ಉಪಾಧ್ಯಕ್ಷರಾದ ಜ| ಮುಜೀಬುರ್ರಹ್ಮಾನ್ ಪಿ., ಪೀಪಲ್ಸ್ ಪೌಂಡೇಶನ್ ಚೇರ್ ಮೆನ್ ಜ| ಎಂ.ಕೆ. ಮುಹಮ್ಮದಲಿ, ಜ.ಇ. ಹಿಂದ್ ರಾಜ್ಯ ಕಾರ್ಯದರ್ಶಿ ಜ| ಅಕ್ಬರಲಿ ಉಡುಪಿ, ಎಚ್.ಆರ್.ಎಸ್. ರಾಜ್ಯ ಕಾರ್ಯದರ್ಶಿ ಜ| ಮುಹಮ್ಮದ್ ಮರಕಡ, ಜ.ಇ. ಹಿಂದ್ ಕೇರಳ ರಾಜ್ಯ ಜತೆ ಕಾರ್ಯದರ್ಶಿ ಜ| ಸಾದಿಕ್ ಉಳಿಯಲ್ ಮತ್ತು ವಿವಿಧ ಗಣ್ಯ ವ್ಯಕ್ತಿಗಳು ಹಾಗೂ ಸ್ಥಳೀಯ ಜನ ಪ್ರತಿನಿಧಿಗಳು ಭಾಗವಹಿಸಲಿದ್ದಾರೆ ಎಂದು ಜ.ಇ. ಹಿಂದ್ ಮಂಗಳೂರು ವಲಯ ಸಂಚಾಲಕ ಅಬ್ದುಸ್ಸಲಾಮ್ ಯು ತಿಳಿಸಿದ್ದಾರೆ.
IslamKannada News Portal

