ದಶಕದಿಂದ ಆಂತರಿಕ ಘರ್ಷಣೆಗೆ ನಲುಗಿ ಹೋಗಿರುವ ಸಿರಿಯಾದಲ್ಲಿ ಪುಟ್ಟ ಮಕ್ಕಳ ಬದುಕಂತೂ ಕರುಣಾಜನಕವಾಗಿದೆ. ಪುಟ್ಟ ಮಕ್ಕಳನ್ನು ಸಾಕಲಾಗದೆ ಅಥವಾ ತಮ್ಮ ಜೊತೆ ಈ ಮಕ್ಕಳೂ ಸಾಯಬಾರದು ಎಂದು ಬಯಸಿದ ತಂದೆ ತಾಯಂದಿರು ಮಕ್ಕಳನ್ನು ಮಸೀದಿಯ ಮುಂದೆ ಮತ್ತು ಇನ್ನಿತರ ಕಡೆ ಬಿಟ್ಟು ಹೋಗುತ್ತಿರುವ ಕರುಣಾಜನಕ ಕಥೆಯನ್ನು ಮಾಧ್ಯಮಗಳು ವರದಿ ಮಾಡಿವೆ.
ಇಬ್ರಾಹಿಂ ಉಸ್ಮಾನ್ ಎಂಬವರು ಮಸೀದಿಯ ಪಕ್ಕದಲ್ಲಿ ಅನಾಥವಾಗಿದ್ದ ಹೆಣ್ಣು ಮಗುವನ್ನು ಮನೆಗೆ ಕರಕೊಂಡು ಹೋಗಿ ಆ ಮಗುವಿಗೆ ಹಿಬಾದತುಲ್ಲಾ ಎಂದು ಹೆಸರು ಕೊಟ್ಟಿರುವ ಘಟನೆಯನ್ನು ಅರಬ್ ನ್ಯೂಸ್ ವರದಿ ಮಾಡಿದೆ
2021 ಮತ್ತು 22ರ ನಡುವೆ ನೂರಕ್ಕಿಂತಲೂ ಅಧಿಕ ಅನಾಥ ಮಕ್ಕಳು ಪತ್ತೆಯಾಗಿವೆ ಎಂದು ವರದಿಯಾಗಿದ್ದು ಇದರ ನಿಜವಾದ ಲೆಕ್ಕಗಳು ಹಲವು ಪಟ್ಟು ಹೆಚ್ಚಿರಬಹುದು ಎಂದು ತಿಳಿಸಲಾಗಿದೆ. ಇಂಥ ಅನಾಥ ಮಕ್ಕಳ ಲೆಕ್ಕಗಳು ಅಧಿಕೃತವಾಗಿ ಬಹಳ ಕಡಿಮೆ ದಾಖಲಾಗುತ್ತಿದೆ ಎಂದು ಕೂಡ ತಿಳಿದು ಬಂದಿದೆ.
ಬಡತನ ಅಭದ್ರತೆ ಅಪೌಷ್ಟಿಕತೆ ಮತ್ತು ಸಾವು ಬದುಕಿನ ಭಯದ ನಡುವೆ ಪುಟ್ಟ ಮಕ್ಕಳು ಅನಾಥವಾಗುತ್ತಿವೆ.
ಸುಮಾರು 12 ವರ್ಷಗಳಿಂದ ನಡೆಯುತ್ತಿರುವ ಸಿರಿಯಾದ ಆಂತರಿಕ ಘರ್ಷಣೆಯಲ್ಲಿ ಈಗಾಗಲೇ ಐದು ಲಕ್ಷ ಮಂದಿ ಸಾವಿಗೀಡಾಗಿದ್ದು, ಮಿಲಿಯಾಂತರ ಮಂದಿ ನಿರಾಶ್ರಿತರಾಗಿದ್ದಾರೆ.
IslamKannada News Portal
