193 ಮಂದಿ ಕೊರೋನಾ ಶಂಕಿತರಿಗೆ ಕ್ವಾರಂಟೈನ್ ತಾಣವಾಗಿ ಬದಲಾದ ಬೀದರ್ ನ ಶಾಹೀನ್ ಶಾಲೆ: ಊಟದ ಜೊತೆ ಎಲ್ಲ ಸೌಲಭ್ಯಗಳೂ ಉಚಿತ

ಬೀದರ್, ಏಪ್ರಿಲ್ 15- ಇಲ್ಲಿನ ಶಾಹೀನ್ ಶಾಲೆಯು ರಾಜ್ಯದಲ್ಲಿ ಮತ್ತೊಮ್ಮೆ ಸುದ್ದಿಗೆ ಗ್ರಾಸವಾಗಿದೆ.

ಕೊರೋನಾ ಶಂಕಿತ 193 ಮಂದಿಗೆ ಕ್ವಾರಂಟೈನ್ ಗಾಗಿ ತನ್ನ ಶಾಲೆಯನ್ನೇ ಶಾಹೀನ್ ಆಡಳಿತ ಜಿಲ್ಲಾಡಳಿತಕ್ಕೆ ಬಿಟ್ಟುಕೊಟ್ಟಿದೆ. ಅಲ್ಲದೆ, ಈ 193 ಮಂದಿಗೆ ಊಟ, ಮಾಸ್ಕ್, ಗ್ಲೌಸು, ಸಾಬೂನು, ನೀರು ಸಹಿತ ಎಲ್ಲವನ್ನೂ ಶಾಹೀನ್ ರೆಸಿಡೆನ್ಶಿಯಲ್ ಪಿಯು ಕಾಲೇಜಿನಲ್ಲಿ ಒದಗಿಸಲಾಗಿದೆ. ಈ 193 ಮಂದಿಯಲ್ಲಿ ಹಿಂದೂಗಳು, ಮುಸ್ಲಿಮರು ಸೇರಿದಂತೆ ಎಲ್ಲ ಧರ್ಮದವರೂ ಇದ್ದಾರೆ. ಮಹಿಳೆಯರೂ ಪುರುಷರೂ ಇದ್ದಾರೆ.

ಈ ಮೊದಲು ಕೊರೋನಾ ಶಂಕಿತರನ್ನು ಸರಕಾರಿ ಹಿಂದುಳಿದ ವರ್ಗಗಳ ಹಾಸ್ಟೆಲ್ ನಲ್ಲಿ ಇರಿಸಲಾಗಿತ್ತು. ಆದರೆ ಈ ಹಾಸ್ಟೆಲು ಜನವಸತಿ ಪ್ರದೇಶದಲ್ಲಿ ಇರುವುದರಿಂದ ಕೊರೋನಾ ಶಂಕಿತರನ್ನು ಇಲ್ಲಿ ಇರಿಸುವುದಕ್ಕೆ ಸುತ್ತಮುತ್ತಲಿನ ಜನರಿಂದ ತೀವ್ರ ಆಕ್ಷೇಪ ವ್ಯಕ್ತವಾಯಿತು. ಅಲ್ಲದೆ ಬೀದರ್ ನ ಆಸುಪಾಸಿನಲ್ಲಿರುವ ಯಾವ ಶಾಲೆಗಳು ಕೂಡ ಕ್ವಾರಂಟೈನ್ ಗಾಗಿ ಶಾಲೆಗಳನ್ನು ಬಿಟ್ಟುಕೊಡಲು ಒಪ್ಪಿರಲಿಲ್ಲ. ಇಂತಹ ಸಂದರ್ಭದಲ್ಲಿ ಶಾಹೀನ್ ಶಾಲೆಯು ತನ್ನೆಲ್ಲಾ ಸೌಲಭ್ಯಗಳ ಜೊತೆ ಕೊರೋನಾ ಶಂಕಿತರಿಗೆ ಆಶ್ರಯ ಒದಗಿಸುವುದಾಗಿ ಜಿಲ್ಲಾಡಳಿತಕ್ಕೆ ಭರವಸೆ ಕೊಟ್ಟಿದ್ದಲ್ಲದೆ ಹವಾನಿಯಂತ್ರಿತ ಕೋಣೆಗಳನ್ನು ಕೂಡ ಬಿಟ್ಟುಕೊಡುವುದಕ್ಕೆ ಸಿದ್ಧವಾಯಿತು.

ಈ ಮೊದಲು ಬೀದರ್ ಜಿಲ್ಲಾಡಳಿತಕ್ಕೆ 8 ವಾಹನಗಳನ್ನು ಈ ಶಾಲೆಯ ಬಿಟ್ಟುಕೊಟ್ಟಿತ್ತು. ಕೊರೋನಾದ ಜಾಗೃತಿಗಾಗಿ ಮತ್ತು ಕೊರೋನಾ ರೋಗಿಗಳನ್ನು ಸ್ಥಳಾಂತರಿಸುವುದಕ್ಕೆ ಮತ್ತು ಅವರ ಸಂಬಂಧಿಕರನ್ನು ಪರೀಕ್ಷೆಗಾಗಿ ಕರೆತರುವುದು ಇತ್ಯಾದಿಗಳಿಗಾಗಿ ಈ ವಾಹನಗಳನ್ನು ಬಳಸಿಕೊಳ್ಳಲಾಗುತ್ತಿದೆ.

ಇದೇ ಶಾಲೆಯ ಪ್ರಾಥಮಿಕ ತರಗತಿಯ ಮಕ್ಕಳು ಆಡಿದ ನಾಟಕವನ್ನು ನೆಪವಾಗಿಸಿಕೊಂಡು ತಿಂಗಳ ಹಿಂದೆ ಜಿಲ್ಲಾಡಳಿತ ವಿಪರೀತ ಕ್ರಮವನ್ನು ಕೈಗೊಂಡಿತ್ತು. ವಿದ್ಯಾರ್ಥಿಯ ತಾಯಿ ಮತ್ತು ಶಿಕ್ಷಕಿಯ ಮೇಲೆ ದೇಶದ್ರೋಹ ಪ್ರಕರಣವನ್ನು ದಾಖಲಿಸಿ ಜೈಲಿಗೆ ಅಟ್ಟಲಾಗಿತ್ತು. ಶಾಲೆಯ ಮೇಲೂ ಕೇಸು ದಾಖಲಿಸಲಾಗಿತ್ತು.